Description
Hai cans: cariñosos, alegres, entregados, entusiastas, sociables… E moito máis alá está Vela, a cadela máis rebosante de amor do mundo enteiro!
Vela é como unha supercachorra. Na súa cabeciña só hai sitio para cousas boas. Todo lle gusta, todo lle vale e todo lle aproveita. Encántalle a xente, os outros cans e o mundo en xeral. Ela naceu para ser feliz, ese é o seu único obxectivo, todo o demais dálle igual.
Vela é unha festa constante. Inocente, sensible, entusiasta e efervescente. Unha forza da natureza con enerxía para exportar. Cun corazón tan grande que podería albergar mundos enteiros. Un brillante bulebule que reparte alegría e fai amigos por onde queira que vai.
Ten tanto afecto que dar que se acumula no seu interior como o gas dunha gasosa. Infinitas burbullas de amor brotan desta cousa pequena cando lle quitas a “tapa”.
